YebboMedia

የዘንድሮው ኦሎምፒክ ለኢትዮጵያ በታሪኳ ሳይጻፍ መታለፍ ያለበት ኦሎምፒክ ይመስለኛል። “የማያድግ ጥጃ ከገመዱ ያስታውቃል ” እንዲሉ ችግራችን ጎልቶ የታዬው ገና ከመክፈቻው ስነ ስርአት ላይ ነበር። ብራዚል አግዜር ይይላትና የሀገሮችን ቅደም ተከተል በፖርቱጋኛ አድርገውት ኢትዮጵያ የመጣችው ከአሜሪካ ሶስተኛ ሆና ነው። ማለትም በአሜሪካ እና በኢትዮጵያ መካከል እስቶንያ የምትባል አገር ነበረች። ይህ ያልተለመደ ቅደም ተከተል ለኢትዮጵያ ብዙም አልጠቀማትም ። እኛ ኦሎምፒክን ከአሜሪካ ለምንከታተል ሰወች ያዬነው ፍዳ አይጣል ነው። ታስታውሱ እንደሆን የአሜሪካ አትሌቶች ብዛት ከ አምስ መቶ በላይ ስለነበር ቴሌቭዥኑ እነሱን ሲያሳይ ከጀርባው የኢትዮጵያ ቡድን ወደ ስታዲዮሙ መግባት ማሳታወዊያ እያስተጋባ ነበር ግን ምንም ቪዲዮ የለመ። ከዚያ በስንት መከራ በጉሎ ቀለም የተነከረ የመሰለ የተጨማደደ ካኪ እና እራፊ ጨርቅ የጠመጠሙ ያገራችን ልጆች ብቅ አሉ። እኔ አንዱንም አላውቃቸውም። ምንም ሰምቼ አይቼ የማላውቃቸው ልጆች ብቅ አሉ：：

በአንድ ወቅት አንድ ሰው የነገረኝ ትዝ አለኝ። እንደሰማሁት ኢትዮጵያ ወጪውን ስለማትችለው አትሌቶቻችን የሚመጡት በተጀመረ በሳምንቱ ሰለሆነ አብዛኛውን የመክፈቻው ቀን የሚሰለፉት የኢምባሲ ሰራተኞች እና ልጆች ናቸው ተብዬ ስለነበር ያዬሁትም ያ ነው ብዬ ነበር። ግን ለምልክት እንኳ ቢሆን ከነዚያ ነብር አትሌቶቻችን እንድ ለዘር እንኳ ይጥፉ？ ዛሬ አትሌቶቻችን ተመስገን ነው ገንዘብ በሽ በሽ ነው። ሁሉም ባለ ሆቴል እና ባለ ንግድ ባለቤት ስለሆኑ ማንንም ሳያስቸግሩ በክብር ወጫቸውን ችለው ለዚህ ያበቃቸውን ሙያ በአደባባይ ባንዲራችንን ተሽክመው ቢሄዱ ለኛም ለነሱም ክብር ነው። ያንን ባንዲራ መሸከም እኮ ታላቅ ክብር ሲሆን ዝም ብሎ ለማንም የሚሰጥ ሳይሆን አገርና ወገንን ሊያስጠራ ለሚችል አትሌት ነው። ያ አትሌትም ገና ለገና ያሸንፋል ሳይሆን አሽንፎ በወርቅ ሜዳልያ ደረቱ ያጌጠ መሆን አለበት ። ለምሳሌ የአሜሪካው ባንዲራ ተሸካሚ ማይክል ፈልስ ከአስራ ዘጠኝ በላይ ሜዳልያ አለው። ለምሳሌ አንዷ አገር የባንዲራ ተሸካሚ ወይም ያዥ ለመሆን የአገሪቷ ህዝብ በስልክ ምርጫ አድርጎ አሸንፋ ነው። ሌሎች አገሮች ለባንዲራቸው የሚሰጡት ክብር ከኛ አገር የት ጠፋ？

ሌላው በጣም የሚያሳዝነው አለባበሳችን ነው። የኛ ባንዲራ ቀለም የነፃነት ቀለም ነው ተብሎ ስለሚታመን አርንጓዴ፣ ቢጫ፣ ቀይ በተላያየ አይነት ቅደም ተከተል የራሳቸው ያደረጉ አገሮች በጣም ብዙ ናቸው። ባንዲራችን አለም አቀፍ ነው። ታዲያ ምነው የተለበሰው ልብስ ነጭና አረንጓዴ ሆነ？ በትንሹ በማይስክሮስኮፕ የምትታይ ባንዲራ ጣል ተደርጎ (Yahoo Sports) ያሁ ስፖርት አንዳለው በጣም ከሚያስጠሉ አለባበሶች ውስጥ አንዱ ሆን? እረ ጎበዝ ምን ነካን ባጣም ተዋረድን እኮ?ኦሎምፒክ እኮ ከዘምን ዘመን ከትውልድ ትውልድ የሚተላለፍ ታሪክ ነው። ምንው እንዲህ አቅልለን አየነው። እኔ በበኩሌ እድሉ የሚሰጠኝ ከሆነ በሚቀጥለው ኦሎምፒክ የአገሬን አትሌቶች ለማልበስ ፈቃደኛ ነኝ። ግን ምን ዋጋ አለው እነ (Adidas) አዲዳስ እያሉ።

ሌላው የአትሌቶች ፊት ልክ የተገረፈች ህፃን ልጅ መምሰሉ ነው። ምን አስኮረፋቸው? ተገደዋል? ተገርፈዋል? ሁሉም ፊታቸው ወደ ኦሎምፒክ መክፈቻ ሳይሆን ወደ ቀብር የሚሄዱ ነው የሚመስለው። ሁሉ ያዘኑ ቂም የያዙ ይመስላሉ።

የዚህ አመት ኦሎምፒክ ብዙ ጉድ አለው። ገና ከጅምሩ የአትሌቶች አመራረጥ አድሏዊ የሆነ ችሎታን ሳይሆን ዘርን የተመረኮዘ ነው በማለት እነ ቀነኒሳ ቅሬታቸውን አስምተው ነበር። ይህ ነገር እስከ ዛሬ በ ኦሎምፒክ ታሪካችን ውስጥ እንዲህ ጎላ ተብሎ ሲወራ የመጀመሪያው ነው። ታዲያ በዚህ ኦሎምፒክ ላይ ያሉ አትሌቶች ችግር አለባቸው ማለት ነው። ግማሹ ቂም ይዞ ግማሹ ደግሞ ችሎታ ሳይሆን ዘመድ ይዞ ነው የቀረበው ማለት ነው። ታዲያ ይህ ቡድን ወርቅ ሳይሆን ጉድ እና ስድብ ይዞ ክች እንዳይል መፍራት ነው።

እስካሁን አላችሁ ？እያነበባችሁ ነው？ በሉ ይህንን ፅሁፍ ለመፃፍ የገፋፋኝ ዋና ሃሳብ ልንገራችሁ። ያው ስለ መከረኛው ሮቤል ነው። በራሱ አንደበት ከቪኦኤ （የአሜሪካ ድምፅ） ጋር ካዳመጥሁት ቃል ምልልስ የሰማሁትን በመመርኮዝ ነው።

ሮቤል እንዳለው እሱ ሪዮ የመጣው በአባቱ ሳይሆን ስምንት አመት ሙሉ ለፍቶ ነው ለዚህ የበቃው：： እና አባቱ ፌድሬሽኑ ብዙ ገንዘብ ስለሌለው ከራሳቸው ኪስ አውጥተው ነው ያመጡት። አቶ ሮቤል አንድ ጥያቄ ልጠይቅህ የአባ ህ ደሞዝ ስንት ነው？ ይህ የአደባባይ ሚስጢር መሆን አለበት ። ምክንያቱም የሮቤል አባት ደሞዝ ከኢትዮጵያ መንግስት የሚከፈል ስለሆነ ደሞዛቸው ይህን ወጪ ለመሸፈን ይበቃል ወይ？ በተለይ ደግሞ ዋና በጣም ብዙ ውጪ ይጠይቃል። ሩጫ ወጣ ብሎ እንጦጦ ላይ በነፃ ላይ ታች ማለት ነው ዋና ግን አስልጣኝ አለ፣ የመዋኛ ገንዳ አለ ፣ የሰውነት መገንቢያ አለ ፣ ምግብ አለ፣ ልብስ አለ ሌላም ሌላም ወጪ አለ። ይባስ ብሎ ሮቤል የሚሰለጥነው ሎንደን ሄዶ ነበር አሉ ; ታዲያ የአባቱ ገቢ ይህንን ሁሉ ወጪ የሚሽፍን ከሆነ የኢትዮጵያ ስፖርት ፌድሬሽን ለአቶ ሰውነት ቢሻው እንኳ ደሞዛቸውን ለማሳደግ የተሳነው? ይህንን አባቴ ከኪሳቸው ከፍለው ነው ላለው እራርሱን የቻለ ምርመራ እና ክትትል ያስፈልገዋል።

ሌላው ሮቤል ያለው በሚኪና አደጋ ተጎድቶ ስለነበር ትንሽ ክብደት ጨምሮ ነበር አሁን የምታዩት ክብደት ትንሽ ከቀነሰ በኋላ ነው ብሏል። ታዲያ አባቱ ይህንን እያወቁ ብቁ ያልሆነ ሰው እንዴት አገርን ያክል ወክሎ እንዲሳተፍ ፈቀዱ። ይህ ሰው ወፍራም ብቻ ሳይሆን የአካል ጉዳተኛም ነበር ማለት ነው። ይህ እራሱ ሮቤል ነው ያለው። ግን የሮቤል አባት እንዴት ለዚህ ስልጣን በቁ? ከዚህ በፊት ልምድ ነበራቸው? ይህም እራሱን የቻለ ጥያቄ ነው።

ሌላው እራሱ ሮቤል የተናገረው ነው። እሱ እንዳለው አንድ የኦሎምፒክ ዋናተኛ ዋና ገና ከህፃንነቱ ጀምሮ የለመደ የሰለጠነ መሆን አለበት ብሏል። ያ ትክክል ነው። ታዲያ ሮቤል ለመጀመሪያ ጊዜ ውሃ የነካው መቼ ነው？ ይህንን ለራሱ ለሮቤል እንተወው ። ግን ከህፃንነታቸው ጀምረው ውሃ ውስጥ ልክ እንደ ውሃ እናት እና እንደ አሳ የሚንሳፈፉ ብዙ ዜጎች ያሉባት አገር እንዴት ውሃ በአመት አንዴ እንኳ አይቶ ለማያውቅ ሰው ቅድሚያ ይሰጣል？ ይህ እኮ ቀልድ አይደለም። “ልብ ካዘነ እንባ አይገደም ” እንደሚባለው በትንሽ ወጪ ሰልጥነው አገርን ሊያስጠሩ የሚችሉ ዋናተኞች ማፍራትን ስንችል ገና ለገና ከኦሎምፒክ ዋና ኮሚሽን የተሳትፎ የግብዣ ወረቀት መጣልን ብሎ ካለምንም ውድድር በዝምድና ብቻ አጠገቡ ያለውን ሰው ግባ ማለት ወንጀል ነው። የሮቤል አባት ያደረጉት ጥፋት ለልጃቸው የዘላለም ፀፀት፣ ለኢትዮጵያ ህዝብ ደግሞ የዘላለ ውርደት ነው። የኢትዮጵያ መንግስት ይህንን አይን አውጣ የዘር መድሎ አሰራር ፊት ለፊት መጋፈጥ አለበት። ይህ ላለውም ሆነ ለሚመጣው ትውልድ የማይጠቅም ጥቁር ጠባሳ ነው። ሮቤል በራሱ አንደበት ተናግሯል። “ ባንዲራ ያዥ መሆኔን ያወቅ ሁት ሰላሳ ደቂቃ ሲቀረው ነው” ሲል “ባንዲራውም ከብዶኝ ነበር” ብሏል። ይህ ማለት ለመዘጋጀት አራት አመት ሙሉ ያለን ሰወች “ሰርገኛ መጣ በርበሬ ቀንጥሱ” እንደሚሉት ሮቤልን በአገር ያለው ወንድ እሱ ብቻ ስለሆነ ባንዲራ ያዥ አድርገውት ነበር？ ሌላው የሮቤልን የአካል ብቃት በራሱ አንደበት ገሀድ ያወጣው ባንዲራው ከብዶት ነበር። እንዲህ ነው ያለው “ባንዲራውን ያዝ ስባል በጣም ነው ደስ ያለኝ በቦታው የነበርሁ ወንድ እኔ ብቻ ስለነበርሁ፣ በጣም ከብዶኝ ነበር እነሱ የሰጡን ለሌሎች የፕላስቲክ ሲሆን የኛ ግን የብረት መያዣ ነብር ” ብሏል። ይህ የሚያሳየው ሮቤል የአካል ብቃቱ እንኳን ለዋና ለባንዲራ መሸከም ልፍስፍስ መሆኑን ነው። ሌላው ሮቤል ያነሳው ስለ ምግብ ነበር። እሱ እንዳለው “ዋናተኛው በቂ ምግብ ማግኘት አለበት ግን የምግብ ችግር አለ “ ብሏል። ማን ይሙት ሮቤል ይምግብ ችግር ያለበት ይመስላል ？ ለዚያውም ትንሽ ቀንሶ። ኤዲያ ...

ታዲያ ሮቤልም ሆነ አባቱ በቀጥታም ሆነ በተዘዋዋሪ ለዚህ ውርደት ተጥያቂዎች ታላቅ ምክር አለኝ። በ 2008 እኤአ ማጣሪያ ላይ የጃማይካው ተወላጅ ያለማችን ፈጣን ሯጭ ሁሴን ቦልት (Hosin Bolt) ያመጣው ውጤት ለሚቀጥለው ውድድር ሊያሳልፈው አልቻለም ገና በመጀመሪያው ውድ ድ ር ላይ ወደቀ። ያ ግን ሁሴንን አላስጨናቀውም በሚቀጥለው ሲመጣ የአለምን ክብረ ወሰን ልክ ከፎቅ ላይ እንደቀደቀ ሽክላ ድስት ስብርብሩን ነው ያወጣው። ታዲያ የናንተው ተግባር ይህ መሆን አለበት ብስፈልጉ ሮቤልን ሆስፒታል አስገብታሁ ሆዱን ቀንሱ፣ ጅምናዚየም ገብታችሁ ጡንቻ አስቀጥሉለት ጣናንን ሰንጥቆ ይሂድ የመሰላች ሁን አድርጉ ነገር ገን የሳሬ አራት አመት ብቁና ዝግጁ ተደርጎ እንዲህ አፈር ላይ የተንከባለለውን የኢትዮጵያን ስም ጠርጎ ጠራርጎ፣ ወልውሎ አሽሞንሙኖ ከነበረበት እንዲመልሰው፣ አለበዚያ እናንተ ዘላለም በኢትዮጵያ ታሪክ ውስጥ ታሪክን በማጉደፍ ስማችሁ በቀይ ብእር ተፅፎ ይኖራል። ይህ ቀልድ አይደለም። ታሪካችሁ ከትውልድ ትውልድ ስለሚተላለፍ ይምታፍሩብተ እራርስችሁ ናችሁ ። አደራ！

የሮቤል ችግር ገና መጀመሩ ነው እንጂ አላለቀም። የዚህ አመት ኦሎምፒክ የተሞላው በአገር ፍቅር ስሜት ሳይሆን በቂምና በጥላቻ ነው። ሁሉም አትሌቶች ደስተኛ አይደሉም። ሁሉም የየራሳቸው የሆነ ድክመት እና ቂም አለባቸው። በዘመድ የገቡት ችሎታ የሌላቸው ሲሆን ታዋቂ አትሌቶቻችን ደግሞ በሁኔታወች ሁሉ ደስተኛ ስላልሆኑ በሙሉ ልብ አይሳተፉም። ምክንያቱም በቀጥታም ሆነ በተዘዋዋሪ ለዚህ የዘር መድሎ ተጥቂዎች ናቸው እና። ታዲያ የሮቤል ነገር እንኳንም ገሀድ ወጣ፣ የሱ በአለም አቀፍ መድረክ መዋረድ ተደፋፍኖ የነበረውን የአሰራር ብልሹነት ገሀድ ያወጣዋል። ኦሎምፒክ የህዝብ ነው። አትሌቶች ፣ የህዝብ ናቸው ታዲያ የኢትዮጵያ ኦሎምፒክ ኮሚቴም ማወቅ ያለበት የሚመጣው ድልም ሆነ ጉድ የህዝብ ስለሆነ በታሪክ ከመወቀስ ለመዳን አደራ የዘር እና የግል ጥቅማችሁን ቤታችሁ በሳጥን ቆልፋች አስቀምጣችሁ 150% ኢትዮጵያን ለማገልገል እና ኢትዮጵያውያን አንገታችንን ቀና አድርገን እንድንሄድ አድርጉን።