የህወሓት ጽንፈኛ ቡድን የመከላከያ ሰራዊትና የኤርትራ ሰራዊት የደንብ ልብስን እያመረተ በማጭበርበር ስራ ውስጥ መግባቱ ተገለጸ

የህወሓት ጽንፈኛ ቡድን የመከላከያ ሰራዊትና የኤርትራ ሰራዊት የደንብ ልብስን እያመረተ በማጭበርበር ስራ ውስጥ መግባቱ ተገለጸ

------------------------------------------------

የህወሓት ጽንፈኛ ቡድን የኢትዮጵያ ሀገር መከላከያ ሰራዊትና የኤርትራ ሰራዊት የደንብ ልብስን እያመረተ የማጭበርበር ስራ ውስጥ መግባቱ ተገለጸ፡፡

ከዋልታ ጋር ቆይታ ያደረጉት በሀገር መከላከያ ሰራዊት የኢንዶክተርነሽን ዳይሬክተር ተወካይ ብርጋዴል ጄነራል ኩማ ሚዴቅሳ ፅንፈኛው የህወሓት ቡድን እየደረሰበት ያለውን ሽንፍት ተከትሎ የኤርትራ ሰራዊት የደንብ ልብስ አመሳስሎ በማምረትና ቅጥረኞችን በማልበስ በቁጥጥር ስር አዋልኩ የሚል ድራማ እየተወነ ነው ብለዋል፡፡

በትግራይ ክልል በሚገኘው አልመዳ ጨርቃ ጨርቅ ፋብሪካ በህወሓት ውስጥ የሚገኘው ጽንፈኛ ቡድን የኢትዮጵያ ሀገር መከላከያ ሰራዊትና የኤርትራ ሰራዊት የደንብ ልብስን አመሳስሎ እያመረተ እንደነበረ ይታወቃል ያሉት ብርጋዴል ጄነራል ኩማ፣ የጽንፈኛ ቡድኑ ገና ብዙ ማጭበርበሪያ ስራዎችን እየሰራ በመገናኛ ብዙኃን ሊያስተላልፍ ስለሚችል ህዝቡ ይህን ሊረዳ ይገባል ብለዋል፡፡

ጽንፈኛው ቡድኑ እርስ በእርስ የሚጋጩ የሀሰት ወሬዎችን መንዛቱን እንደቀጠለ እና ለሚሰራቸው ወንጀሎች ሌላን አካል ተጠያቂ ለማድረግ እንደሚጥር ተናግረዋል፡፡

ጽንፈኛ ቡድኑ በኤርትራ መንግስት እንደተመታ አድርጎ የሀሰት ወሬ እየነዛ ነው የተባለ ሲሆን፣ የሀገር መከላከያ ሰራዊት ከኢትዮጵያም አልፎ ሰላምንና ደህንነትን በማስጠበቅ በኩል ይታወቃል፤ የማንንም የውጪ ጣልቃ ገብነት አይፈልግም ሲሉም ተናግረዋል፡፡

ሀገር መከላከያ ሰራዊት በደረሰበት ጥቃት ቁጭት ውስጥ ገብቶ ይህን ጽንፈኛ ቡድን በህግ ቁጥጥር ስር ለማዋል እየሰራ ነው ያሉት ብርጋዴል ጄነራል ኩማ ህዝቡ የከሃዲው ቡድን የሚነዛውን የሀሰት ወሬ ወደ ጎን በመተው ከሀገር መከላከያ ሰራዊት ጎን እንዲቆም ጥሪ አቅርበዋል፡፡

ይህ ጽንፈኛ ቡድን የኢትዮጵያ ሀገር መከላከያ ሰራዊት የደንብ ልብስንም አመሳስሎ በማምረት ለጥፋት ስራው ተጠያቂ ለማድረግ እየጣረ በመሆኑ ህብረተሰቡ በንቃትና በጥንቃቄ አካባቢውን እንዲቃኝ ብርጋዴር ጄነራሉ አሳስበዋል፡፡

(በመስከረም ቸርነት)